← Kthehu te Ballina

Mediat gjermane japin detaje për aksidentin tragjik ku vdiqën dy të rinj nga Rahoveci

ShpërndajeFacebookWhatsApp
Mediat gjermane japin detaje për aksidentin tragjik ku vdiqën dy të rinj nga Rahoveci

Një aksident i rëndë trafiku në Gjermani u mori jetën tre personave, mes tyre edhe dy të rinjve nga Komuna e Rahovecit, Leart Morina dhe Berhan Zeka. Ngjarja ndodhi të dielën pasdite në rrugën B311, pranë qytetit Erbach, në landin Baden-Württemberg, ku u përfshinë gjithsej nëntë automjete.

Dy të rinjtë nga Kosova janë identifikuar si Leart Morina nga fshati Sopniq dhe Berhan Zeka nga Pataqani i Poshtëm. Lajmin për vdekjen e tyre e ka konfirmuar edhe kryetari i Komunës së Rahovecit, Smajl Latifi, i cili u ka shprehur ngushëllime familjeve Morina dhe Zeka.

Sipas raportimeve të mediave gjermane, në aksident humbën jetën në vendngjarje dy drejtuesit e automjeteve, të moshës 18 dhe 19 vjeç. Ndërkaq, një pasagjer 26-vjeçar, i cili kishte pësuar lëndime kërcënuese për jetën, ndërroi jetë të dielën në mbrëmje në spital.

Në aksident u lënduan edhe tre persona të tjerë. Në mesin e tyre ishte edhe një pasagjere 26-vjeçare, gjendja shëndetësore e së cilës, sipas policisë, nuk ishte bërë ende e ditur në njoftimin e së hënës.

Dy të rinj nga Rahoveci humbin jetën në një aksident të rëndë në Gjermani

Si ndodhi aksidenti?

Sipas hetimeve paraprake të policisë gjermane, dyshohet se drejtuesi 18-vjeçar humbi kontrollin mbi automjetin e tij, derisa po kryente një manovër parakalimi me shpejtësi të lartë, në segmentin rrugor mes vendbanimeve Dellmensingen dhe Donaurieden, në afërsi të Erbachut, transmeton Telegrafi.

Automjeti i tij fillimisht u përplas me disa vetura të tjera, përpara se të goditej ballë për ballë me një makinë që po vinte nga drejtimi i kundërt.

Përplasja shkaktoi dëme të mëdha materiale, ndërsa automjeti i drejtuesit 18-vjeçar u copëtua në disa pjesë. Në vendin e ngjarjes intervenuan një numër i madh i ekipeve emergjente, përfshirë policinë, zjarrfikësit dhe shërbimet e emergjencës, si dhe kapelanë të krizave.

Rruga B311, në segmentin mes vendbanimeve Dellmensingen dhe Donaurieden, mbeti e mbyllur për qarkullim për më shumë se 20 orë.

Policia ka bërë të ditur se për përcaktimin e shkakut të saktë dhe rindërtimin e dinamikës së aksidentit është angazhuar një ekspert. Hetimet në vendngjarje kanë vazhduar edhe të hënën, ndërsa autoritetet kanë marrë në pyetje dëshmitarët për të sqaruar rrethanat e plota të kësaj tragjedie./Telegrafi/

Burimi: telegrafi.com

Artikull i përzgjedhur dhe përpunuar automatikisht nga Zani Digjital.

Lajme të ngjashme