Tragjedia në Demiraj të Gjilanit, çfarë dihet deri më tani për vdekjen e 27-vjeçarit dhe foshnjës tre muajshe
Një ngjarje e rëndë ka tronditur qytetin e Gjilanit, ku në fshatin Demiraj janë gjetur pa shenja jete një 27-vjeçar dhe një foshnjë tre muajshe.
Rasti është raportuar më 1 nëntor, rreth orës 08:47, kur Policia e Kosovës ka pranuar informacion për dy persona të pajetë në një shtëpi në këtë fshat.
Në vendin e ngjarjes kanë dalë njësitet policore, Prokurori i Shtetit dhe ekipi emergjent mjekësor, të cilët kanë konstatuar vdekjen e dy viktimave.
Pas hetimeve fillestare, Policia ka arrestuar një 65-vjeçar, babanë e 27-vjeçarit, i cili dyshohet për vrasjen e dyfishtë. I dyshuari është ndaluar për 48 orë me vendim të prokurorit, ndërsa rasti është cilësuar si “Vrasje e rëndë”.
Megjithatë, rrethanat e plota të kësaj ngjarjeje ende nuk janë sqaruar. Trupat e pajetë janë dërguar në Institutin e Mjekësisë Ligjore për obduksion, ndërsa hetimet po vazhdojnë.
Për këtë tragjedi ka reaguar edhe kryetari i Gjilanit, Alban Hyseni, i cili ka shprehur ngushëllime për familjarët e viktimave, duke e cilësuar humbjen e dy jetëve si një ngjarje që ka prekur të gjithë qytetarët.
“Humbja e jetëve në rrethana që ende nuk janë sqaruar në tërësi është një tragjedi që na prek secilin”, ka shkruar Hyseni.
Ai ka kërkuar angazhim të plotë të institucioneve për zbardhjen e rastit.
“Presim që organet e rendit dhe të drejtësisë që të bëjnë punën e tyre me përkushtim të plotë për zbardhjen e të gjitha rrethanave të këtij rasti”, ka deklaruar kryetari i Gjilanit.
Ndërkaq, lidhur me rastin ka reaguar edhe ministrja e Drejtësisë, Donika Gërvalla, e cila ka theksuar rëndësinë e sigurisë brenda familjes dhe nevojën për reagim institucional.
“Familja duhet të jetë streha më e sigurt e njeriut, vendi ku mbizotërojnë dashuria, harmonia, kujdesi dhe mbrojtja”, ka deklaruar Gërvalla.
Ajo ka kërkuar që institucionet përgjegjëse të veprojnë pa vonesa për zbardhjen e plotë të ngjarjes.
“Në këto momente, është e domosdoshme që rrethanat e këtij rasti të hetohen plotësisht dhe pa vonesa, në mënyrë që e vërteta të zbardhet dhe institucionet përgjegjëse të ndërmarrin veprimet që kërkon ligji”, ka shkruar ministrja.
Ndërkohë, institucionet e rendit dhe drejtësisë po vazhdojnë hetimet për zbardhjen e plotë të kësaj tragjedie që ka tronditur Gjilanin.
Të rejat Lexo më shumë
Amerikanët drejt Hënës deri në vitin 2028, NASA përshpejton misionin historik!
'Si një raketë që bie nga lart' – Nëntë të vdekur, të tjera detaje dhe pamje nga rrëzimi një aeroplani në Florida, i cili u përfshi nga flakët
Java nis me mot të vranët dhe temperatura të ulëta, të martën priten reshje shiu e bore