Ndryshon pushteti, por jo ambiciet ushtarake: Lista Studentore synon ta rrisë buxhetin e mbrojtjes në 5% të PBB-së
Lista zgjedhore e mbështetur nga studentët në Serbi, e cila fitoi zgjedhjet e parakohshme parlamentare të muajit të kaluar dhe pritet të udhëheqë qeverinë e re, ka prezantuar një plan për të rritur ndjeshëm shpenzimet e mbrojtjes.
Sipas propozimit, buxheti për mbrojtjen synon të rritet gradualisht nga niveli aktual prej rreth 2% deri në 2.5% të Prodhimit të Brendshëm Bruto (PBB), fillimisht në 3% dhe më pas në 5%.
Luka Ponorac, ish-oficer i Ushtrisë Serbe dhe përfaqësues i listës, tha për transmetuesin publik RTS se zbatimi i planit do të varet nga burimet financiare dhe njerëzore që do të ketë në dispozicion qeveria e re.
Programi parashikon gjithashtu rritjen e pagave të personelit ushtarak me 20% deri në 30%, si dhe zvogëlimin e dallimeve në paga mes gradave dhe pozicioneve të ndryshme, sipas raportimit të Anadolu-t.
Sa i përket modernizimit të ushtrisë, prioritet do të kenë sistemet e artilerisë raketore me rreze veprimi nga 150 deri në 300 kilometra, mbrojtja ajrore me rreze të shkurtër, të mesme dhe të gjatë, si dhe blerja e dronëve dhe sistemeve të avancuara të komunikimit dhe mbikëqyrjes.
Programi parasheh gjithashtu forcimin e institucioneve ushtarake dhe garantimin që shërbimet e sigurisë dhe inteligjencës ushtarake të veprojnë në përputhje me ligjin.
Lista e mbështetur nga studentët fitoi 140 nga 250 ulëset në parlamentin serb në zgjedhjet e 25 tetorit, duke siguruar shumicën për formimin e qeverisë së re. Megjithatë, parlamenti ende nuk është mbledhur dhe qeveria e re nuk është formuar zyrtarisht.
Të rejat Lexo më shumë
Goditi ish-vjehrrin me drapër, gjykata vendos arrest me burg për dajën e deputetes Çaushi
Bonusi i ri i bebeve në Shqipëri, mbështetje mujore për 5 vite për çdo fëmijë nga 1 korriku 2027
Rrëzuan Vuçiqin, por nuk ndryshojnë qëndrimin për Kosovën – deklaratat nacionaliste të Listës Studentore pas vizitës në Graçanicë