← Kthehu te Ballina
Politikë 21/10/2026 22:02

MASh-i nis bashkëbisedimet me prindërit për Strategjinë e Arsimit 2035+

MASh-i nis bashkëbisedimet me prindërit për Strategjinë e Arsimit 2035+

Ministri i Arsimit dhe Shkencës, Hajrulla Çeku, në bashkëpunim me kryetarin e Këshillit të Prindërve të Kosovës, Besnik Dragusha, ka nisur ciklin e bashkëbisedimeve me prindërit në nivel vendi, në kuadër të hartimit të Strategjisë së Arsimit 2035+.

Në njoftim bëhet e ditur se, takimi i parë është mbajtur në Prishtinë, ku prindërit patën mundësinë të shprehin shqetësimet, të paraqesin propozimet dhe të japin rekomandime për të ardhmen e sistemit arsimor në Kosovë.

Ministri Çeku ka theksuar se arsimi është çështje që prek çdo familje dhe se përmirësimi i sistemit arsimor kërkon angazhim të përbashkët.

Sipas tij, përfshirja aktive e prindërve është thelbësore për të siguruar që shqetësimet dhe nevojat e tyre të merren parasysh në vendimmarrje.

Ndërkaq, kryetari i Këshillit të Prindërve të Kosovës, Besnik Dragusha, ka vënë në pah rëndësinë e përfshirjes së prindërve në proceset vendimmarrëse që lidhen me arsimin.

Ai ka theksuar gjithashtu rolin e Këshillit në përcjelljen e kërkesave, shqetësimeve dhe propozimeve të familjeve.

Gjatë takimit, prindërit kanë ndarë përvojat e tyre dhe ngritën çështje që lidhen me sfidat e nxënësve dhe familjeve në sistemin arsimor, duke ofruar ide dhe rekomandime për përmirësimin e tij.

“Cikli i bashkëbisedimeve do të vazhdojë edhe në qendrat e tjera rajonale të Kosovës, me synimin që prindërit nga mbarë vendi të kontribuojnë në strategjinë e re të arsimot, që do të përcaktojë drejtimin e zhvillimit të sistemit arsimor për dekadën e ardhshme”, theksohet në njoftim.

Reklamë