Liverpooli rikthehet nga disavantazhi dhe ia shkakton Brentfordit humbjen e parë sezonale
Liverpooli reagoi pas disavantazhit dhe arriti fitore 2-1 ndaj Brentfordit, që përfundoi ndeshjen me nëntë lojtarë.
Brentfordi tani ka humbur gjithsej 105 pikë nga pozitat e epërsisë në kampionat që nga rikthimi në Premierligë në vitin 2021, më shumë se çdo skuadër tjetër.
Pas 20 minutave të para të baraspeshuara, me pak raste të vërteta shënimi, Michael Kayode iu afrua golit të parë për vendasit, por goditja e tij, e devijuar nga Jeremy Jacquet, përfundoi ngushtë pranë shtyllës.
Liverpooli më pas u nis në kundërsulm nga këndi i ekzekutuar nga Brentfordi dhe Bradley Barcola duhej ta kishte shtuar edhe një gol pas “hat-trickut” të shënuar në mesjavë kundër LASK Linzit, por, pasi doli i vetëm përballë Caoimhin Kelleherit, e dërgoi topin jashtë portës.
Igor Thiago pothuajse pati një rast po aq të pastër për shënim, por u ndal nga një tjetër ndërhyrje vendimtare e Jacquetit, i cili po zhvillonte një paraqitje mbresëlënëse.
Brentfordi filloi ta merrte iniciativën, por Liverpooli mendoi se kishte fituar një penallti kur Dango Ouattara u vërsul ndaj Alexis Mac Allisterit dhe e rrëzoi atë.
Megjithatë, VAR-i e njoftoi me të drejtë gjyqtarin se ndërhyrja ishte e pastër dhe e kryer në momentin e duhur.
Mysafirët nuk mund të ankoheshin kur Keane Lewis-Potter e zhbllokoi rezultatin në minutën e 44-t, duke u zgjatur për ta devijuar bukur në rrjetë harkimin e Thiagos, përtej Alissonit.
Por, në një moment çmendurie gjatë minutave shtesë të pjesës së parë, Yehor Yarmolyuk e goditi me kokë Jacquetin, teksa të dy po përleshin para ekzekutimit të një këndi, duke marrë një karton të kuq krejtësisht të panevojshëm.
Thiago pothuajse ia komplikoi edhe më shumë gjërat trajnerit Keith Andrews pas pushimit, por shpëtoi me karton të verdhë, pasi dukej se e kishte goditur me bërryl Jacquetin vetëm 12 sekonda pas fillimit të pjesës së dytë. Me epërsinë numerike të Liverpoolit që mbeti vetëm një lojtar, Brentfordi arriti ta ruante një repart mbrojtës kompakt, duke vazhduar njëkohësisht të paraqiste rrezik në kundërsulme.
Megjithatë, Alexis Mac Allister pothuajse arriti të krijonte diçka, duke kaluar me mjeshtëri pranë disa kundërshtarëve, para se ta detyronte Kelleherin të bënte një pritje të mirë. Në fund, Victor Munoz ishte ai që e shënoi golin e barazimit, duke depërtuar me zgjuarsi nga brenda dhe duke e dërguar topin në cep të portës, për ta thyer rezistencën e fortë të vendasve.
Pas golit, loja u zhvillua kryesisht në një drejtim dhe Alexander Isak përfundimisht e shfrytëzoi këtë epërsi, duke e kontrolluar topin nën presion të madh dhe duke e dërguar me qetësi përtej portierit, për ta kaluar Liverpoolin në epërsi.
Brentfordi më pas u detyrua të dilte përpara dhe Thiago pati një mundësi të shkëlqyer për ta barazuar sërish rezultatin, por nuk arriti ta godiste siç duhet topin nga vetëm gjashtë metra larg portës.
Traversa ia mohoi Barcolas mundësinë për ta vulosur fitoren, por skuadra e Andoni Iraolas arriti ta ruante epërsinë deri në fund.
Kjo u lehtësua edhe nga kartoni i dytë i kuq, i ndëshkuar në minutat shtesë ndaj Vitaly Janeltit, i cili e ndali një kundërsulm premtues të Liverpoolit, pasi më herët ishte ndëshkuar me karton të verdhë për protesta ndaj gjyqtarit.
Fitorja shënoi suksesin e parë të trajnerit spanjoll në kampionat ndaj Brentfordit pas tetë përballjeve (1 fitore, 2 barazime, 5 humbje) dhe i dha fund startit të pamposhtur të Brentfordit në këtë edicion të kampionatit.
Liverpooli gjithashtu e ka kaluar Brentfordin në tabelë, me “Reds” që i kanë 12 pikë, derisa “Bees” dhjetë sosh.
Të rejat Lexo më shumë
Qytetarë e policë të lënduar, Ministria e Shëndetësisë njofton bilancin nga protesta në Tiranë
Vazhdojnë përplasjet në Tiranë, një polic përfshihet në flakë pas hedhjes së molotovit, disa të tjerë mbeten të lënduar prej gurëve
Shtatë ndeshje, shtatë fitore – City i pandalshëm në Premierligë