Kloppi zbulon se do ta përkrahë Barçën para Realit në “El Clasico”
Jo shumë kohë më parë, Jürgen Klopp konsiderohej një kandidat serioz për ta zëvendësuar Álvaro Arbeloan në stolin e Real Madridit për sezonin 2026/27.
Emri i trajnerit gjerman përmendej shpesh gjatë fushatës për zgjedhjet presidenciale të klubit, të planifikuara për verën. Megjithatë, Klopp nuk dëshironte të largohej nga Red Bull në atë kohë, ndërsa Real Madridi përfundimisht vendosi ta emëronte José Mourinhon.
Tre muaj pas fillimit të sezonit të ri, Klopp ka marrë drejtimin e kombëtares së Gjermanisë dhe duket se ish-trajneri i Liverpoolit tashmë e ka bërë të qartë se cilën skuadër mbështet.
Para “El Clasicos” së kësaj fundjave, Klopp u pyet se për cilën skuadër do të bëjë tifo.
Gjermani nuk e fshehu dashurinë e tij për këtë përballje, duke pranuar se është një ndeshje që thjesht nuk mund ta injorojë.
“Është një ndeshje që më pëlqen ta shikoj”, deklaroi ai për “DAZN”, sipas “AS”.
Edhe pse fillimisht u përpoq të qëndronte i paanshëm, Klopp në fund pranoi se këtë fundjavë do të mbështesë skuadrën që është në formë më të mirë.
“Sot bëj tifo për atë që është skuadra më e mirë. Dhe, bazuar në situatën aktuale, ajo skuadër është ndoshta Barcelona”, shtoi ai.
Ish-trajneri i Liverpoolit shpjegoi më pas se dikur e mbështeste Barcelonën pa rezerva në përballjet me Real Madridin.
“Në të kaluarën, isha më shumë tifoz i Barcelonës, sepse e urreja mënyrën se si Pepe dhe mbrojtësit e tjerë ndërhynin ashpër ndaj gjithçkaje që u dilte përpara në atë kohë. Kjo ishte arsyeja e vetme pse e mbështesja më shumë Barcelonën”, shpjegoi ai.
Duke marrë parasysh se Klopp ka drejtuar klube si Borussia Dortmundi dhe Liverpooli, të dyja me lidhje të forta me komunitetin dhe tifozët e tyre, simpatia e tij për Barcelonën ndoshta nuk është edhe aq befasuese.
Megjithatë, këtë fundjavë gjermani do të jetë më pak i interesuar për fitoren e Barcelonës dhe më shumë për paraqitjet e futbollistëve gjermanë. Karim Adeyemi është njëri prej lojtarëve që mund të bëjë dallimin nëse aktivizohet si zëvendësues në fund të ndeshjes.
Të rejat Lexo më shumë
Rumania akuzon Rusinë për përshkallëzim në Detin e Zi
Pacolli reagon pasi Peci ia ndërlidhi emrin me dosjen e atentatit ndaj Jusuf Gërvallës: Do t’iu drejtohem autoriteteve në Gjermani
Specialja flet pasi vajza e Jakup Krasniqit alarmoi për gjendjen e tij dhe refuzimin për t’u mjekuar në qelinë e Hagës