Guvernatori Ismaili takohet me Zëvendësdrejtorin Menaxhues të FMN-së, diskutojnë për stabilitetin financiar, reformat strategjike dhe bashkëpunimin institucional
Guvernatori i Bankës Qendrore të Republikës së Kosovës (BQK), Ahmet Ismaili, i shoqëruar nga anëtarët e delegacionit të BQK-së, zhvilloi takim bilateral të nivelit të lartë me Zëvendësdrejtorin Menaxhues të Fondit Monetar Ndërkombëtar (FMN), Bo Li, dhe ekipin e tij, në kuadër të Takimeve Vjetore 2026 të FMN-së dhe Grupit të Bankës Botërore.
Takimi u fokusua në zhvillimet financiare në Kosovë, qëndrueshmërinë e sistemit financiar, progresin në zbatimin e reformave strategjike dhe prioritetet për forcimin e mëtejshëm të bashkëpunimit ndërmjet BQK-së dhe FMN-së.
Guvernatori Ismaili theksoi stabilitetin e vazhdueshëm dhe performancën e mirë të sektorit financiar të Kosovës, duke nënvizuar se sektori bankar mbetet mirë i kapitalizuar, likuid dhe i qëndrueshëm, ndërsa sistemi financiar në tërësi vazhdon të dëshmojë stabilitet.
Ai theksoi qasjen e BQK-së që vendos stabilitetin financiar në qendër të prioriteteve, të mbështetur në forcimin e mbikëqyrjes së bazuar në rrezik, avancimin e kornizës makroprudenciale, përmirësimin e monitorimit të rreziqeve sistemike dhe përafrimin e vazhdueshëm të kornizës rregullative dhe mbikëqyrëse me standardet evropiane dhe ndërkombëtare.
Guvernatori i BQK-së prezantoi progresin e konsiderueshëm në zbatimin e Planit Strategjik të BQK-së 2024-2028 dhe rekomandimeve që burojnë nga vlerësimet dhe misionet e asistencës teknike të FMN-së. Theks i veçantë iu kushtua avancimit të mbikëqyrjes së bazuar në rrezik në të gjithë sektorin financiar, forcimit të kornizave për stabilitetin financiar dhe menaxhimin e krizave, përmirësimit të qeverisjes dhe qëndrueshmërisë institucionale, si dhe zhvillimit të kapaciteteve analitike, të parashikimit makroekonomik dhe mbikëqyrëse të BQK-së.
Ai më tej theksoi rëndësinë e ruajtjes së dinamikës së reformave dhe gatishmërisë institucionale për t’iu përgjigjur sfidave në një mjedis ndërkombëtar gjithnjë e më kompleks dhe të pasigurt.
Në emër të BQK-së, ai shprehu mirënjohjen për partneritetin afatgjatë me FMN-në dhe rolin e rëndësishëm të këtij institucioni në mbështetjen e zhvillimit të sektorit financiar dhe reformave institucionale në Kosovë.
Ai nënvizoi rëndësinë e vazhdimit të asistencës teknike të koordinuar mirë, të orientuar drejt zbatimit efektiv dhe qëndrueshmërisë së reformave, zhvillimit të kapaciteteve institucionale dhe transferimit të ekspertizës ndërkombëtare.
Në këtë kontekst, u riafirmua përkushtimi i fuqishëm i BQK-së për themelimin dhe funksionalizimin e Qendrës Rajonale të Asistencës Teknike të FMN-së për Evropën Juglindore (SEETAC).
Guvernatori Ismaili theksoi se BQK-ja tashmë ka konfirmuar dhe përmbushur kontributin e saj në këtë iniciativë. Ai mirëpriti themelimin e qendrës së re rajonale si një investim të rëndësishëm në ngritjen e kapaciteteve institucionale, bashkëpunimin rajonal dhe qëndrueshmërinë afatgjatë të institucioneve financiare dhe ekonomike, si dhe konfirmoi pjesëmarrjen e tij në ceremoninë zyrtare të inaugurimit.
Të dyja palët riafirmuan përkushtimin për thellimin e mëtejshëm të partneritetit strategjik ndërmjet BQK-së dhe FMN-së, duke u mbështetur në arritjet e deritanishme dhe duke identifikuar mundësi për vazhdimin e asistencës teknike, shkëmbimin e njohurive dhe bashkëpunimin institucional.
BQK mbetet e përkushtuar për ruajtjen e stabilitetit financiar, avancimin e reformave dhe forcimin e qëndrueshmërisë, besueshmërisë dhe efektivitetit të sistemit financiar të Kosovës, në mbështetje të rritjes së qëndrueshme ekonomike dhe përafrimit të mëtejshëm me standardet evropiane dhe ndërkombëtare.
Të rejat Lexo më shumë
Eventi më 15 Tetor ku teknologjia do të rishkruajë të ardhmen e biznesit shqiptar
Ylli i Barcelonës pritet të rikthehet ndaj PSG-së në Ligën e Kampionëve
A duhet të punojnë gratë në menopauzë? Zvicra po kërkon që grave t'u mundësohet edhe puna nga shtëpia