← Kthehu te Ballina
Politikë 19/10/2026 18:16

E NESËRMJA NUK LIND SOT, SHQIPËRIA IME

E NESËRMJA NUK LIND SOT, SHQIPËRIA IME

I njoh mirë tregtarët e zjarrit unë.

I pashë njëherë,

në vitin e mbrapshtë ’97,

tek qëllonin Zotin me pushkë hekuri

në ballë.

Që atëherë,

sa herë digjet e vritet Shqipëria,

dikush del në oborr

dhe shpall pranverën

në kopshtin e tij.

Jo!

E nesërmja nuk lind nga mesha e tregtarëve të gjakut,

Shqipëria ime,

as prej duarve të atyre që gozhdojnë

Atdheun në kryq.

E di mirë, unë:

jo çdo gjë që ka flakë

e çon popullin në këmbë.

Sot, kur zjarri të ha të gjallë,

lind dhimbja;

kur Atdheu digjet në flakë,

lind turpi;

sot, kur vëllai godet vëllain,

lind urrejtja,

lind hakmarrja,

lind vëllavrasja…

E nesërmja nuk lind sot,

Shqipëria ime!

As Prometeu s’ua fal zjarrin

atyre që abuzojnë me dritën,

Shqipëria ime.

Reklamë