← Kthehu te Ballina
Ekonomi 31/10/2026 16:16

Dua Lipa fiton betejën ligjore për domenin që përdorte emrin e saj pa autorizim

Dua Lipa fiton betejën ligjore për domenin që përdorte emrin e saj pa autorizim

Këngëtarja shqiptare Dua Lipa ka fituar një çështje ligjore ndaj një tregtari nga Hong Kongu, i cili kishte përdorur emrin e saj për të promovuar dhe shitur produkte pa autorizimin e artistes. Si rezultat i vendimit, domeni i përdorur për këtë aktivitet do të kalojë në pronësi të kompanisë së saj.

Sipas gazetës “Daily Mail”, një person i identifikuar si Gary kishte krijuar faqen dualipa-asiastore.com, përmes së cilës tregtonte veshje, çanta dhe aksesorë, duke krijuar përshtypjen se biznesi kishte lidhje me këngëtaren.

Çështja u dërgua pranë Organizatës Botërore të Pronësisë Intelektuale (WIPO), e cila, pas shqyrtimit të ankesës, vendosi në favor të Dua Lipës. Sipas vendimit, domeni ishte regjistruar dhe përdorur në keqbesim, ndaj u urdhërua transferimi i tij te kompania e artistes.

Vendimi vjen në një kohë kur emri i Dua Lipës përfaqëson jo vetëm një markë të njohur në industrinë muzikore, por edhe një biznes me vlerë të konsiderueshme financiare.

Dokumentet e kompanive të saj tregojnë se këngëtarja ka gjeneruar rreth 23.4 milionë paund nga muzika, të drejtat autoriale, koncertet dhe aktivitetet e tjera tregtare. Ndërkaq, kompania e saj Radical22 vlerësohet në rreth 73 milionë paund.

Reklamë