Çitaku priti ambasadorin britanik, diskutuan zhvillimet politike dhe perspektivën euroatlantike të Kosovës
Ushtruesja e detyrës së kryetares së Partisë Demokratike të Kosovës (PDK), Vlora Çitaku, ka pritur të enjten në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për zhvillimet e fundit politike në vend.
Sipas njoftimit të PDK-së, Çitaku e ka vlerësuar pozitivisht përmbylljen e procesit të formimit të institucioneve, duke theksuar se vëmendja tashmë duhet të përqendrohet në adresimin e sfidave me të cilat përballen qytetarët dhe në avancimin e prioriteteve shtetërore.
“Kosova përballet me sfida të rëndësishme që kërkojnë vëmendje të plotë institucionale, përgjegjësi dhe angazhim për të përmirësuar jetën e qytetarëve”, ka theksuar Çitaku.
Gjatë takimit është diskutuar edhe për procesin gjyqësor në Dhomat e Specializuara të Kosovës në Hagë. Në këtë kontekst, Çitaku ka theksuar rëndësinë e respektimit të standardeve më të larta të drejtësisë, të drejtës për gjykim të drejtë dhe të një vendimmarrjeje të bazuar në fakte e prova, pa ndikime politike.
Në fund të takimit, është riafirmuar rëndësia e partneritetit të qëndrueshëm të Kosovës me aleatët ndërkombëtarë dhe përkushtimi ndaj perspektivës euroatlantike, përfshirë synimin për anëtarësim në NATO dhe Bashkimin Evropian.
Të rejat Lexo më shumë
Sekuestrimi i 37 kg narkotikë, gjykata merr vendim për pesë të pandehurit
Jo vetëm Kosova dhe Shqipëria, edhe top gjigantët gjermanë në garë të madhe për Lutfi Dalipin
Demokratët tani do të hakmerren ndaj Trumpit dhe sojit të tij