Arsim Vranovci takon deputetin austriak Andreas Minnich: Mbështetje për Shqipërinë dhe Kosovën në rrugën drejt BE-së
Avokati Arsim Vranovci, president i Shoqatës së Miqësisë Kosovë–Austri, i cili jeton dhe punon në Kosovë e Shqipëri dhe zhvillon veprimtari edhe në Austri, u takua me Andreas Minnich, deputet i Këshillit Kombëtar të Austrisë dhe nënkryetar i Komisionit për Politikë të Jashtme.
Në qendër të takimit ishte mbështetja e Austrisë për integrimin evropian të Shqipërisë dhe Kosovës, si dhe angazhimi parlamentar për avancimin e këtij procesi.
Vranovci kërkoi nga Minnich që, përmes rolit të tij në Parlamentin austriak dhe në Komisionin për Politikë të Jashtme, të mbështesë përparimin e Shqipërisë drejt Bashkimit Evropian, me synimin që vendi të jetë pjesë e BE-së deri në vitin 2030. Ai theksoi nevojën që ky objektiv të mbetet në agjendën e bashkëpunimit dhe të mbështetjes politike nga partnerët evropianë.
Njëkohësisht, Vranovci kërkoi mbështetje për Kosovën, në mënyrë që edhe asaj t’i hapet një perspektivë e qartë dhe konkrete për avancimin drejt anëtarësimit në Bashkimin Evropian.
Minnich shprehu gatishmërinë që, në kuadër të përgjegjësive të tij parlamentare dhe si mik i shqiptarëve, të angazhohet në mbështetje të këtij drejtimi. Bashkëbiseduesit u pajtuan të vazhdojnë komunikimin dhe bashkëpunimin për të mbështetur rrugëtimin evropian të Shqipërisë dhe Kosovës dhe për të forcuar lidhjet e tyre me Austrinë.
Të rejat Lexo më shumë
Vazhdoi gjykimi ndaj nëntë policëve për zjarrin në diskotekën “Puls", më 14 nëntor do të paraqiten provat
T’i ndalojë apo t’i ndërtojë? Evropa shqyrton mënyrat për të rregulluar rrjetet sociale
Presidenti i Paraguajit, Santiago Peña, jep dorëheqjen pas kolapsit të një banke që lidhej me të