← Kthehu te Ballina
Lajme 05/11/2026 19:02

Apeli e rëndon dënimin ndaj Bashkim Gashit, do të vuajë 10 vjet burg për sulmin ndaj bashkëshortes dhe vajzës

Apeli e rëndon dënimin ndaj Bashkim Gashit, do të vuajë 10 vjet burg për sulmin ndaj bashkëshortes dhe vajzës

Bashkim Gashi është dënuar me 10 vjet burgim për sulmin me thikë ndaj bashkëshortes dhe vajzës së mitur në Prizren, pasi Gjykata e Apelit ka vendosur t’ia ashpërsojë dënimin e shqiptuar nga shkalla e parë.

Fillimisht, Gjykata Themelore në Prizren e kishte dënuar Gashin me 7 vjet e 6 muaj burgim, por pas ankesës së Prokurorisë Themelore, rasti u shqyrtua nga Departamenti për Krime të Rënda i Apelit, i cili vendosi që dënimi të rritet në 10 vjet.

Në arsyetimin e vendimit, Apeli vlerësoi se faktet e rastit ishin vërtetuar drejt nga gjykata e shkallës së parë, por dënimi i shqiptuar nuk ishte në përputhje me peshën dhe rrezikshmërinë e veprës penale, si dhe pasojat e saj.

Ngjarja kishte ndodhur më 17 tetor 2025 në Prizren. Të dyja viktimat kishin marrë lëndime të rënda si pasojë e goditjeve me thikë dhe ishin dërguar për trajtim mjekësor në Spitalin e Prizrenit.

Në dënimin e ri prej 10 vjetësh do të përfshihet edhe periudha që Gashi ka kaluar në paraburgim.

Ndërkohë, Gjykata e Apelit ka bërë të ditur se aktgjykimi i plotë nuk do të publikohet, për shkak se çështja lidhet me një vepër penale të kryer në kuadër të marrëdhënieve familjare.

Reklamë