“6-she n’kajmak”, Bayerni e ‘shkatërron’ Leipzigun
Bayern Munichu u ngjit në krye të Bundesligës, pasi “hat-tricku” i shkëlqyer i Luis Diazit i frymëzoi bavarezët drejt një fitoreje bindëse 6-1 ndaj RB Leipzigut, duke përsëritur rezultatin e sezonit të kaluar në përballjen përkatëse.
Pasi e kishte regjistruar fillimin më të dobët të një sezoni në Bundesligë në pesë ndeshjet e para, në katër vitet e fundit (3 fitore, 2 barazime), Bayerni dukej i vendosur të jepte një sinjal të qartë që në fillim ndaj Leipzigut, i cili ende nuk kishte marrë asnjë pikë në ndeshjet si mysafir (2 humbje).
Bavarezët e dominuan çerekorëshin e parë dhe synimi i tyre sulmues u shpërblye me golin e epërsisë, kur Diaz vrapoi drejt pasimit që çau mbrojtjen nga Joshua Kimmich dhe e dërgoi topin në rrjetë me një goditje të sigurt, përtej Maarten Vandevoordtit.
Ky ishte vetëm goli i dytë i kolumbianit në kampionat këtë sezon, por pak më vonë ai dha një tjetër kontribut vendimtar, duke e shërbyer Aleksandar Pavlovicin në zonë, i cili shënoi me një goditje të saktë pranë shtyllës së afërt.
Me epërsinë e sigurt prej dy golash, Bayerni pothuajse e zgjeroi edhe më shumë avantazhin para minutës së 30-të, kur Ismael Saibari gjuajti mbi portë nga afërsia, ndërsa goditja diagonale e Michael Olises u devijua në shtyllë nga Vandevoordt.
Megjithatë, francezi nuk u ndal dhe në minutën e 34-t shënoi golin e tretë të Bayernit, duke përfunduar me qetësi nga 18 metra pas pasimit të zgjuar prapa nga Harry Kane.
Pushimi nuk arriti ta ndalte hovin e vendasve, pasi Diazi e shënoi golin e dytë personal të mbrëmjes në minutën e 47-të, me një goditje të harkuar në këndin e poshtëm të portës.
Pasi kishte shënuar të paktën pesë gola në secilën prej tri ndeshjeve të fundit në shtëpi në kampionat, Bayerni e vazhdoi këtë seri mbresëlënëse, ndërsa Kane e festoi paraqitjen e tij të 100-të në Bundesligë me një gol të lehtë nga afërsia, pas pasimit prapa të Nathaniel Brownit.
Me afrimin e gjysmëorëshit të fundit, Vincent Kompany vendosi ta pushojë Kane përpara përballjes së mesjavës me Arsenalin në Ligën e Kampionëve, por Bayerni vazhdoi ta kontrollonte plotësisht ndeshjen, ndërsa zëvendësuesi Tom Bischof pa goditjen e tij të fuqishme të ndalej nga Vandevoordt.
Goli i gjashtë erdhi në minutën e 69-të, kur Diazi depërtoi nga brenda dhe realizoi me një goditje të shkëlqyer në këndin e largët, duke e kompletuar “hat-trickun”.
Olise dhe Bischof kërcënuan ta thellonin edhe më shumë rezultatin në minutat e fundit, por ishte Leipzigu ai që shënoi një gol ngushëllues përmes Andrija Maksimovicit, i cili realizoi me mjeshtëri brenda zonës.
Pavarësisht se nuk arriti ta ruante portën e paprekur, Bayerni e përfundoi mbrëmjen me një paraqitje të shkëlqyer, duke kaluar mbi Dortmundin dhe Freiburgun në krye të tabelës, si dhe duke regjistruar fitoren e katërt radhazi në përballjet direkte ndaj “Die Roten Bullen”.
Të rejat Lexo më shumë
Shala zbulon se sa kërkesa për sponsorizim janë shqyrtuar gjatë dy viteve dhe sa para kanë fituar klubet dhe federatat
“La Manita” nga Barcelona ndaj Betisit, e merr fitoren e nëntë në po aq xhiro
Deputeti Shehaj i del përpara drejtorit të Policisë, ndërhyjnë policët e tjerë s’e lënë t’i afrohet